Ku wa gatanu, tariki ya 08 Werurwe 2024, mu ishuri ry’imyuga n’ubumenyingiro rya Mariya Rafaela Nkumba TVET School, riherereye muri Paruwasi ya Kinoni, habereye ibirori byo gutaha no guha umugisha inyubako y’inzu ryujuje aho abanyeshuri baryo bazajya bariramo. Ifite igikoni, ububiko n’aho kogereza. Ryanatanze impamyabumenyi ku banyeshuri 41 barirangirijemo amasomo. Rinizihiza Maria Rafaela, umurinzi waryo.

Igitambo cya Misa cyayobowe na Padiri Festus NZEYIMANA, Ushinzwe guhuza ibikorwa by’ikenurabushyo muri Diyosezi ya Ruhengeri. Yari intumwa ya Nyiricyubahiro Musenyeri Visenti HAROLIMANA muri ibyo birori. Yasabye abanyeshuri bahawe impamyabumenyi gukunda umurimo, gukomeza kwihugura, gukorera hamwe no kudaheza Imana mu byo bakora. Bakihatira gukunda isengesho. Yabakanguriye kubyaza umusaruro amahirwe bahabwa na Kiliziya n’Igihugu; abasaba kutayapfusha ubusa. Yabibukije ko amasomo basoje ari urufunguzo rw’ubumenyi bahawe ngo bazamererwe neza; abifuriza kuvoma ku Mana indangagaciro zibabereye, gukomera ku murage w’urukundo ruzabafasha kwibumbira hamwe mu mashyirahamwe abafasha kurushaho kwiteza imbere bashingiye ku masomo bize. Yagaragaje ko Kiliziya Gatolika ikomeye ku ntego yo gukomeza gutanga uburere buhamye kuri roho no ku mubiri, ifasha ababuhabwa kwiteza imbere.

Mu izina ry’ubuyobozi bwa Leta, Bwana Jean Damascene NDAGIJIMANA, Ushinzwe amashuri yisumbuye, aya tekinike n’ay’ubumenyingiro mu Karere ka Burera iri shuri riherereyemo, yashimye Kiliziya Gatolika ku musanzu itanga mu kwita ku burere bw’abana b’u Rwanda, ayizeza kuzakomeza ubwo bufatanye.

Umuyobozi w’iryo Shuri, Mama Chrisencie MUSANABERA, yagaruka ku mateka n’ubumenyi butangirwa muri iri shuri n’uburyo bugamije guteza imbere umwari n’umutegarugori. Yagaragaje ko rifite icyerekezo cyo gukomeza kongera ubushobozi bwo kwita ku mwari n’umutegarugori.

Abarangirije muri iri shuri bashimye ubumenyi bakuye muri iri shuri bavuga ko buzabafasha kwiteza imbere.

Ishuri Mariya Rafaela Nkumba TVET School ni ishuri ry’imyuga n’ubumenyingiro ryaragijwe Mama Maria Rafaela. Ryashinzwe n’Umuryango w’Ababikira b’Umutima Mutagatifu wa Yezu n’uwa Bikira Mariya. Ryatangiranye n’abanyeshuri b’abakobwa 45 mu mwaka wa 2006. Kuva ubwo kugeza mu mwaka wa 2020 ryitwaga Centre culturel Maria Rafaela Nkumba. Muri iyo myaka 16 ryari rimaze gutanga ubumenyi ku banyeshuri b’abari n’abategarugori bagera kuri 600. Ubu Ishuri Maria Rafaela Nkumba TVT School rimaze imyaka itatu ryemewe na Leta. Tariki ya 6/09/2021 ni bwo ryahawe urwandiko n’Ikigo NESA. Ubu ritangirwamo amashami anyuranye arimo ubudozi, kuboha imipira no gufuma, gusuka n’ubwiza (Hairdressing) n’ikoranabuhanga.

Marie Goretti NYIRANDIKUBWIMANA